Os avances das mulleres na ciencia

Durante séculos as mulleres fomos silenciadas e apartadas da cultura e do saber. Con todo fomos quen de ir formándonos pouco a pouco, de ir conquistando institucións coma a Universidade e de facernos un sitio no coñecemento, grazas en boa medida ao traballo que desenvolveron científicas ocultas tras a figura dun home e que deron a coñecer o éxito dos seus traballos cedendo, en moitos casos, a súa autoría a un home.

 

Hoxe a presenza das mulleres en todos os ámbitos da sociedade é indiscutible pero quedan aínda chanzos por subir. Temos que participar máis nos núcleos de decisión e temos que formar parte das cúpulas do poder. O avance rexistrado nos últimos anos é moi significativo pero é preciso que as futuras xeracións teñan referentes e neste afán, traballos como o publicado esta fin de semana no magazine Mujer de Hoy baixo o título Científicas españolas en vanguardia dan conta de traxectorias de mulleres actuais que destacan no ámbito científico. Especial consideración merecen tamén os informes Ni tontas, ni locas e Mujer y Ciencia da Fundación Española para la Ciencia y la Tecnología (FECYT).